Naim Maloku, nga sot anëtar i AKR-së së Pacollit

Ish nënkryetari i AAK, Naim Maloku sot zyrtarisht është bërë pjesë e subjektit politik të zëvendëskryeministrit, Behgjet Pacolli.

Lajmi është konfirmuar gjatë një konference me gazetarë që po mbahet në këto momente në zyret e AKR te “Qafa” në Prishtinë.

Siç njofton gazetarja e “Zërit”, Valmira Halimi e cila po e përcjell këtë ngjarje, e pranishme në këtë konferencë është edhe zëvendëspresidentja e AKR, Mimoza Kusari Lila. Kjo e fundit e ka cilësuar Malokun “një figurë e shquar dhe luftarake”

Naim Maloku ka thënë se ai po i bashkohet këtij subjekti politik “me një vision të qartë”.

“Prej sot kontributin tim, atë çka mund ta jap tash për vendin, në paqe, do e jap përmes AKR-së”, ka thënë para gazetarëve, Naim Maloku.

“Që tre vjet e percjelli nga afër AKR-në dhe vizioni i saj qe eshte vizion ekonomik per ngritjen e mireqenjes ekonomike sociale te vendit eshte nje prej arsyeve bazë që unë aderoj në këtë parti”, ka thënë më tej, Maloku.

Gjatë konferencës me gazetarë, udhëheqësi i këtij subjekti, Behgjet Pacolli e ka konfirmuar edhe njëherë se AKR nuk do të bëj asnjë koalicion parazgjedhor dhe se subjekti “do të kandidoj i vetëm me njerëzit që ka”.