Haradinaj në shtëpinë e të vrarit, bën thirrje për qetësi

Lideri i AAK’së Ramush Haradinaj ka mbërritur në shtëpinë e të vrarit Bekim Birinxhiku në Qubrrel, ku u ka shprehur ngushëllime familjarëve të tij , njofton Express. Haradinaj u ka thënë familjarëve të Bekim Birinxhikut “që të mos nguten dhe të mos bëjnë asnjë veprim por t’a presin drejtësinë.

AAK: Të zbardhet vrasja e Birinxhikut

Në anën tjetër, Aleanca për Ardhmërinë e Kosovës ka konfirmuar vrasjen në Skënderaj të kandidatit të listës së AAK-së në garën për Asamblenë Komunale të Skënderajt, në zgjedhjet lokale të 3 nëntorit, Bekim Birinxhiku. “AAK, duke u rezervuar nga kualifikimi i këtij rasti të rëndë dhe kriminal mbi jetën e Bekim Birinxhikut, fton organet e rendit dhe të drejtësisë që sa më parë ta zbardhin rastin. Edhe pse nuk dihen motivet, fakti që vrasja është kryer një ditë para zgjedhjeve lokale në Kosovë, duhet t’i shtyjë organet e rendit dhe prokurorinë që ta zbardhin sa më parë këtë krim”, thuhet në komunikatën e AAK-së. Kryetari i kësaj partie, Ramush Haradinaj, ka ngushëlluar familjen Birinxhiku.