Argjentina nënkampione, festë e dhunë nga tifozët

Argentina's fans run away from tear gas as they clash with riot police in Buenos Aires after Argentina lost to Germany in their 2014 World Cup final match in BrazilNdërkohë që vendi i 42 milionë banorëve kishte shpërthyer i tëri në lot e ngashërima, në krah të argjentinasve shfaqen brazilianët, por jo për t’i ngushëlluar. Edhe pse u shpartalluan turpshëm nga gjermanët, tifozët brazilianë që në fillim të finales deklaruan suportin e tyre për europianët, ndërsa në rrugët e Rios u bashkuan me kampionët në festë, duke kënduar ironikisht “Qaj, qaj Argjentina”. Ishte kjo përgjigja më e mirë që brazilianët mund t’i jepnin rivalëve të urryer e për më tepër Diego Maradonës, i cili këto ditë, në çdo rast të mundshëm festonte për disfatën 7-1 të Selecaos.

Ndërkohë në Buenos Aires, pa mbaruar ende spektakli i fishekzjarreve mbi Maracana, qindra tifozë festonin trofeun e nënkampionit, ndërsa qindra të tjerë të zhgënjyer dolën në rrugë duke e nxjerrë inatin e Kupës së humbur me përleshje të dhunshme me policinë. Vendtakimi i të revoltuarve ishte te Obelisku, simboli i kryeqytetit argjentinas, ku zakonisht tifozët mblidhen për të festuar në raste suksesesh të La Seleccion. Për disa momente turma ishte e papërmbajtshme, duke i detyruar forcat e policisë të përdorin plumba gome, gaz lotsjellës dhe ujë me presion ndaj tifozëve të tërbuar. Një luftë e vërtetë me pasoja të konsiderueshme. Krahas dëmeve të shumta materiale rreth sheshit të betejës, 8 policë mbetën të plagosur, ndërsa mbi 50 tifozë përfunduan në pranga. Një kontrast i jashtëzakonshëm si nata me ditën me atmosferën që ofronte Brazili.

Pothuajse në çdo cep të vendit ndihej ritmi i festimeve për kampionët e rinj të botës, por përjashtim mund të bëj kjo përleshje, këtë radhë brenda për brenda familjes. Me nervat të tendosura, disa dhjetëra tifozë argjentinas u përplasën me njëri-tjetrin teksa dilnin kokëulur nga Maracana. Gjithsesi festa e gjermanëve vazhdoi për orë të tëra pa u penguar nga asgjë.